Zaletuok uda osoa iraileko lehen  bi igandeei begira pasatzen dugu. Patroiak egun hauetan daude arinen, eta arraunlariak oraintxe daude sasoi sasoian; traineruetako froga guztiak atzean geratu dira, egun hauetan broma gutxi izaten da arraunaren inguruan. Baina batzuontzat hain serioa dena, dirudienez beste batzuentzat festa folkloriko bat besterik ez da...

“Begira begira nola, dijuan airean, Orioko txalupa olatu gainean” Horrela dio hainbat urtetan Orion kantatutako bertso zaharrak; baina osteguneko sailkapen estropadan ez genuen horrelakorik ikusteko aukerarik izan. ‘Mirotza’ ez zihoan ez airean, ez olatu gainean...

Arraun zaleok sarritan entzun izan dugu Orio Real Madriden antzeko kluba dela, eta egia esan konparaketa honek ez digu grazi askorik egin inoiz hori zale zenbaiti. Erabilitako arrazoiketak: palmaresa, “señorioa”, historia (honi buruz oso kuriosoa eta erabat sinplea Kortak “Noticias de Gipuzkoan” , irailaren 1ean, egindako irakurketa)… Nik, berriz, azken aldian Oriok Atletico  de Madriden tankera duela pentsatzen dut, eta honek grazi gutxiago egiten dit: segundo baten inguruko aldeagatik 3 bandera galdu (Getxon, Bilbon, eta Orion), Castroko estropadan kaleekin suerterik ez, 2. ziabogan arraun txikiarekin arazoak.... ez dut nahi talde koltxoneroarekin inongo parekotasunik, eta are gutxiago Kontxako sailkapen estropadaren atarian.