Mendiko pago, lizar, haritz, pinu, etab.en artean hazi eta hezi garen lehorrekook ondo asko bereizten ditugu bakoitzaren hostoak, azalak eta egur-koloreak. Txikitatik arraunean dabilenak ur korronteak, mareak, haizeak, olatuak, etab. ondo ezagutzen dituen moduan. Bakoitzak dakienaz hitz egin beharko luke akaso eta nik ez dakit ezer asko, ez arraunaz ezta aizkoraz ere, baina aizkora txikitatik gertuagokoa izanik, bien arteko konparazio bat egiten saiatuko naiz.

Komentatu nahi dudan lehenengo puntua kirol saio bakoitzaren iraupena da. Arraunean, estropada normal batek 20 minutu irauten du. Aizkoran ere iraupena nahiko antzekoa izaten da saio askotan; ideia bat egiteko, 10 kanaerdiko lan bat egiteko puntako aizkolari batek behar duen denbora da 20 minutu. Kirolaren izaerari erreparatuz gero ere, badute antzekotasunik. Bietan, gizakia naturaren kontra ari da, teknika ezinbestekoa da eta gizakia berak egindako herramintekin ari da. Kirolariaren ezaugarriei dagokienez ere bada parekotasunik. Bietan pertsona indartsuak behar dira, bietan da garrantzitsua indarra eta teknika, eta bietan dute berebiziko garrantzia gerriaren eta besoen lanak. Erritmoari dagokionez ere antzekoak direla esan daiteke: 50 bat paladatara irtetzen dira traineruak; aizkolariak berriz 50 bat kolperekin hasten dira, eta gero erritmo hori 40 ingurura jaisten dute. Alderaketa honekin amaitzeko apustua aipatu nahi nuke: bietan da garrantzitsua apustua. Zer da estropada bat apustu edo norgehiagoka gabe? Eta zer aizkora saio bat apusturik gabe? (pena izan arren, aizkoran gehiegitxotan egiten dira erakustaldi-saioak).

Antzekotasun horiek guztiak horrela badira ere, egun, bada ezberdintasun garrantzitsu bat. Aizkora duela 20 urte baino maila baxuagoan dago eta arraunak berriz asko hobetu du. Aizkoraren kirol izaera gutxi garatu da eta arrauna berriz, profesionaltze bidean doa. Horregatik, aizkorazale porrokatua eta arraunzale handia naizen aldetik, pena ematen dit  nire kirol maite baten etorkizuna bestearen bezain ona ez dela ikusteak. Espero dut, guztion artean, arraunaren bidetik aizkorak ere aurrera egingo duela. Pagoa eta itsasoa  Euskal Herri beraren anai baititugu.