Hirugarren txandan bizi izan da estropadako lehia estuena, Ondarru eta Mundakaren artean. Nahiz eta itsasoranzko luzeetan Mundaka aurrera egin, bueltakoetan Ondarru arriskuarekin hurbiltzen zitzaien, eta bai eta hurbildu ere, azkenean biak segundo berean sartu dira, hori bai Mundaka aurretik. Donostiarra heldu da hirugarren eta Zarautzen sailkapen orokorrean hirugarren gelditu zen Colindres laugarren, berrogeita hamar segundotara.

San Pedrok eskuratu du garaipena bigarren txandan. Estropada osoan Hibaikarekin lehia bizian ibili eta gero eta honi hiru segundo aterata eta biak aurreko txandako Donostiarraren aurrean geldituz sailkapen orokorrean. Zarautz izan da hirugarren eta Castro laugarren.

Lehenengo txandan bi erronka egon dira. Alde batetik Santander eta Raspasen artean bizitakoa eta bestalde Luanco eta Lutxanaren artekoa. Nahiz eta Santander estropada guztian aurretik joan azkenengo luzean Raspasek gora egin du, ateratzen zizkien bederatzi segundoak berreskuratuz eta helmugatik berrehun metrotara  aurrea hartuz, eta azkenik txanda irabaziz hiru segundoko abantailarekin. Estropadako sailkapen orokorrean biak aurreko txandako Zarautz eta Castroren aurrean gelditu dira. Bestalde Lutxana nahiz eta azkenengo ziabogara azkenengoak heldu, laugarren luze bikaina egin dute eta Luancori helmugan lau segundoko aldea atera diote.