Datorren ostiralean, Maiatzak 1, Bizkaiko eta Gipuzkoako trainerilla ligetako estropadak izango ditugu. Bizkaiko ligako 2. jardunaldia Lekeition jokatuko da goizeko 10:00etatik aurrera. Gipuzkoako Trainerilla Ligako 4. jardunaldia berriz Orion jokatuko da, goizeko 9:00etatik aurrera.

Joan den asteburuan, Cazauboneko nazioarteko estropadak jokatu ziren eta bertan Euskadi eta Akitaniaren arteko matcha jokatu zen. Norgehiagoka Akitaniarrek erraz irabazi zuten, jokatu ziren estropada guztietan Euskadiren aurretik gelditu bait ziren. Estropadetako emaitzak hemen ikusi ditzakezue. Nabarmentzekoa da estropada hauetan parte hartu zuten ontzi kopurua, Frantzian arraunketa olinpikoak dituen arraun zaleen erakusle. Badugu non ikusi eta ikasi...

Emakumezkoen jubenil mailan, euskal taldean nagusi izan ziren, Zumaiarrak txapeldunak izan ziren, Tolosarrak bigarren eta Oriotarrak hirugarren. Beste mailetan, galiziarren nagusitasuna azpimarratu behar da, zazpi txapeletatik bost irabazi bait zituzten. Gizonezko seniorretan berriz, Castro izan zen garaile. Nabarmentzekoa Ondarrutarrek gizonezkoen jubenil mailan lortutako zilarra eta gaztetxoetan lortutako brontzea. Guztira euskal taldeek urre bat, bi zilar eta bi brontze lortu zituzten.

Asteburuan jokatutako Gipuzkoako Trainerilla Ligako estropadetan, Hondarribia eta San Pedroren arteko lehia estua egon da. Asteburuko bi estropadetan Hondarribiarrak nagusitu egin dira eta Ligan San Pedrotarrei aurre hartu diete. Jubenil mailan berriz, Getariarrak nagusi izan dira. Emakumeei dagokienez, Donibane Lohitzunen Getariarrak nagusi eta Mutrikun Zumaiarrak. Eta Gipuzkoako Federazio Trofeoan Zumaiarrak garaile. Gipuzkoako Trainerilla Ligako 2. jardunaldiko emaitzak eta Gipuzkoako Trainerilla Ligako 3. jardunaldiko emaitzak hemen ikusi ditzakezue.

Asteburu honetan 3 trainerilla estropada jokatuko dira Euskal Herriko uretan. Larunbatean, Bizkaiko Trainerilla ligako 1go jardunaldia jokatuko da Ondarrun,16:30etatik aurrera. Ordu berean, Gipuzkoa Trainerilla Ligako 2. jardunaldia jokatuko da Donibane Lohitzunen Ur Juko arraun elkarteak antolatuta. Igandean berriz, Gipuzkoako Trainerilla Ligako 3. jardunaldia jokatuko da Mutrikun 11:00etatik aurrera.

Larunbat honetan, Apirilak 25, Orioko Arraunketa Olinpikoko Nazioarteko Estropadaren XV. edizioa jokatuko da 16:30etatik aurrera. Estropada honetan gizonezkoen  "lemazaindun zortziko"  modalitatea (8+)  eta emakumezkoen "binako laukoan" (4x) arituko dira. Eta aurtengo ekitaldian nobedade gisa, Arraunketa Egokitutako estropada-erakusketa bat izango da Skiff (1x) modalitatean. Estropada honetan arraun egingo duten ontziak hauek dira.

Atzo Euskadiko Batel Txapelketa jokatu zen Portugaleteko Benedicta kai barrenean. Jokoan zeuden zazpi txapeletatik Tolosaldeak hiru irabazi zituen. Marka ikaragarria benetan, are gehiago barnealdeko herria izanda. Bestalde, Gipuzkoarren eta Bizkaitarren arteko lehia nahiko estua izan zen, azkenean 4 eta 3 Gipuzkoarren alde. Txapeldunak hauek izan ziren, infantiletan Getaria irabazle, Kadete mailan Arkote nagusi, jubenil mailan Tolosaldea nabarmendu zen eta senior mailan Bermeo txapeldun. Emakumeei dagokionez, Ondarru infantil-kadete mailan garaile eta jubenil eta senior mailan Tolosaldea nagusi. Zorionak guztioi! Larunbateko kanporaketen emaitzak hemen ikusi ditzakezue eta Igandeko Euskadiko Batel Txapelketako emaitzak hemen.

Datorren Apirilaren 25ean, larunbata, Orioko Arraunketa Olinpikoko Nazioarteko Estropadaren XV. edizioa jokatuko da 16:30etatik aurrera. Estropada hauek gizonezkoen  "lemazaindun zortziko"  modalitatean (8+)  eta emakumezkoen "binako laukoan" (4x) izango dira. Lehiaketako sistema berriz, 1.000 metroko luzera eta 90 minutuko tartean guztira hamalau estropada jokatuko dira, kanporaketako estropadak, finalaurrekoak eta finalak bata bestearen atzetik. Bertan lehen mailako arraunlari ingelesak, portugesak, katalanak, galiziarrak eta euskaldunak lehiatuko dira. Oraindik ez dakite parte hartzaileen behin betiko zerrenda zein izango den. Eta aurtengo ekitaldian nobedade gisa, Arraunketa Egokitutako estropada-erakusketa bat izango da Skiff (1x) modalitatean, 500 metroko luzerarekin eta lau ontzi lehian.

Aste Santuko jai egun hauetan, ez dugu estropadarik izan gurean eta arraun talde gehienek geldiune txiki bat egin dute, indarrak hartu eta berriz ere denboraldiari indarrez ekiteko. Hala ere batzuentzat ez da oporrik izan, hor izan ditugu Euskadiko Selekzioko jubenilak Soustons (Landak) aldean, Munich-eko Nazioarteko estropada prestatzen. Bestalde etena ezin luzea izan, datorren asteburuan bertan, Apirilak 18 eta 19 Euskadiko Batel Txapelketa jokatuko baita. Eta Apirilak 25ean berriz Orioko XV. Nazioarteko estropadaz (arraunketa olinpikoa) gozatu ahal izango dugu. Hurrengo egunetan azkeneko ekitaldi hauen berri emango dizuegu.

Joan den larunbatean, Apirilak 4, Beteranoen Bidasoako 2. jaitsiera jokatu zen. Iruneko Santiagotarrak taldeak antolatzen duen arraunketa olinpikoko estropada honetan Bidasoaren bi ertzetako ontziak parte hartu zuten. Aurten 12 ontzik parte hartu dute, 5 zortziko, 3 lauko, 2 yola eta 2 biko. Hona hemen Beteranoen Bidasoako Jaitsierako parte hartzaileak eta denborak.

Atzo, Apirilak 5, 2009ko Gipuzkoako Batel Txapelketa jokatu zen Pasai San Pedron. Aurtengo txapelketa Urola-Kostako elkarteek menderatu dute, 6 txapeletatik  5 irabazi baitituzte. Hauek izan dira txapeldunak: Nesketan, infantil-Kadete mailan Orio eta jubenil-senior mailan Zumaia. Mutiletan, infantil mailan Getaria, kadete mailan Pasai Donibane, jubeniletan Orio eta senior mailan Zarautz. 2009ko Gipuzkoako Batel Txapelketako emaitzak hemen ikusi ditzakezue.

Deustu eta Ingeniarien arteko 29. estropada jokatu zen atzo Bilbon. Estropadaren ibilbideak Erandio eta Bilboko Udaletxearen artekoak, 4 itsas mila, alegia 7408 metro zituen, Oxford-Cambridge estropadak famatuarenak baino 568m gehiago. Denborak hauxek izan ziren Deustuk 24’ 23” eta EHU-ko Ingeniariak 24’ 35”. Honela bada, aurtengoa Deustuarren  17. garaipena izan da, ingeniariek berriz, orain arte 12 garaipen lortu dituzte.  Bestalde, norgehiagoka honen aurretik Bizkaia-Gipuzkoa Match-a jokatu zen eta lehenengo norgehiagoka honetan Gipuzkoako zortzikoa izan zen garaile.

Atzo eman zitzaien amaiera 2009ko Bizkaiko eta Gipuzkoako batel ligei. Portugaleten Bizkaiko batel ligako 9. jardunaldia jokatu zen eta ligako jardunaldi guztiak kontutan izanda hauexek izan ziren ligako txapeldunak. Pasai San Pedron berriz, Gipuzkoako batel ligako 11. jardunaldia jokatu zen eta hauek izan ziren ligako txapeldunak. Zorionak guztioi!

Atzo, Bizkaiko kostaldeko herrietatik igaro zen euskararen aldeko Korrika. Mundakara iritsi zirenean, hantxe zeuden Mundakako arraun taldekoak zain, baina oraingo honetan batelean arraunean aritu beharrean, korrika ibili ziren batela bizkarrean hartuta. Bejondeiela! Bihar igandea, Gasteizen emango zaio amaiera 2009ko Korrikari. Ika ika ika Korrika!

Datorren igandean, Apirilak 5, Bizkaiko eta Gipuzkoako batel txapelketak jokatuko dira. Bizkaiko txapelketa Portugaleten dagoen Benedicta kai barrenean jokatuko da goizeko 11:00etatik aurrera. Gipuzkoako txapelketa Pasai San Pedron jokatuko da goizeko 9:30etatik aurrera. Larunbatean berriz bi herrialdeetako batel ligei amaiera emango zaie. Bizkaiko Batel ligako azken jardunaldia 15:30etan jokatuko da Portugaleten eta Gipuzkoako batel ligak Pasai San Pedron bukatuko da, 17:00etatik aurrera jokatuko den estropadarekin.