Eguraldi paregabea eta estropada itzela. 16:30etan eman zaio hasera estropadari.  XI. Flaviobriga bandera jokoan, TKE-San Miguel ligako estropadarik aldrebesena ikusi ahal izan dugu. Pedreñak lortu du garaipena, bigarren sailkatu den Kaikurekiko segundo bakar bateko aldea atereaz. Lehia estua izan da bi talde hauen artekoa. Estropada guztian zehar Kaikuk sekulako maila erakutsi du, uneoro lehenengo postuaren jabe zelarik. Hala eta guztiz, azken luzean, Pedreñak Espainiako txapelketako mendekua hartuz, aurrea hartu eta segundo bat lehenago iristea lortu du. Emozioz beteriko txanda ikusi ahal izan dugu.

Tiran izan da gaurko estropadako beste ezustekoa. 1. txandan sekulako erakustaldia eginez, estropada bikaina egitea lortu dute. Txandako bigarren sailkatua izan den Zumaiari 23 segundo atera dizkio Tirango ontziak.

Ohorezko txandaren buru Hondarribia izan da uneoro. San Pedro eta Castro 13-14 segundoetan ibili dira, euren arteko borrokan, Orio 20 segundo galduta atzerago geratu delarik. Azken luzean, espero baina gehiago hurreratu zaizkio hiru ontziak Hondarribiari. Hala eta guztiz, 2. txandako ontziek denbora hobeak egin dituzte.

Zarautz ere sorpresa izan da gaurko estropadan. Maila oso apalean ikusi ditugu estropadan zehar. Helmugaratzean ontzian bertan zioan entrenatzaileak ezbehar bat izan duela eta arraunlari bat gutxiagorekin amaitu dutela estropada ohartarazi dute.

Sailkapenari dagokionez ez da aldaketa nabarmenik gertatu. Castro da nagusi lehenengo postuan, eta biharko emaitzarekin matematikoki garaile izateko aukera du. Hondarribiak berreskuratu du hirugarren postua puntu bakarreko diferentziarekin, Orio laugarrenera eramanaz, eta Zarautzek zazpigarren postua galdu eta zortzigarrenarekin konformatu beharko du. Kaikuren gaurko estropadak zazpigarren postua beregatzeko aukera lortu baitu.

Kontxako sailkapen estropadaren atarian ezinegona sortu duen estropada izan da gaurkoa. Ea bihar Orioko XIX. estropadetan zer gertatzen den!