Dokumentu Akzioak
Illunbe Arraun Elkarteko kirol-instalazioen egoera penagarria salatu dute
Jokin Pego, Trintxerpeko presidenteak, klubaren kirol-instalazioak egoera tamalgarrian daudela salatu du. Teilapeak hautsita, ur putzuak nonahi, leihoen kristalak lurrean botata, lurra goroldioz josita, egoera sostengaezin honekin entrenatzen dute Illunbe Arraun Elkarteko arraunlariek. 60 kirolarik entrenatzen dute egoera hauetan eta ezin dutela horrela jarraitu ohartarazi dute.
Amorru handia Trintxerpeko buruzagiek dutena. 20 urte daramatza klubak Lasako pabiloietan entrenatzen. Gaur egun ordea, eraikina pixkanaka erortzen hasia da. Euria egiten duenean urez betetzen da, argi gabe geratzen dira eta neguan hotz ikaragarria egiten du. Klubak duen irtenbide bakarra Diputazioak eman behar dion 300.000 euroko diru laguntza da. Pasaiako Udaletxeak egoeraren aurrean ez duela ezer egiten salatu dute eta ikusita nolako garrantzia duen arraunak Pasaian, ez dute ulertzen laguntzarik ez jasotzea. Egoera konpondu nahi dute baina horretarako ezinbestekoa zaie erakundeen babesa izatea.
