Dokumentu Akzioak
Zarautzen bazkideen onarpena jaso du zuzendaritzak
Larunbatean eginiko Urteko Batzarrean, Zarautz Arraun Elkarteko zuzendaritzak bazkideen onarpena jaso zuen. Aian duen Ubegun pabiloian burutu zen batzarra eta 35 bazkidek hartu zuten parte. Antxon Illarramendi, presidenteak, eta gidatzen duen zuzendaritzak ekonomi eta kirol arloak jorratu zituzten. Bi ordu iraun zuen bileran aurreko urteko balantze ekonomikoa eta hurrengo denboraldiko aurrekontua aurkeztu zuten.
Arraun Elkartea ez dago egoera samurrean eta nahiz eta denboraldi berrirako aurrekontua 50.000 eurotan gutxitu, bazkideak pozik eta sentsazio onekin atera ziren batzarretik. Babesle garrantzitsuenak, Inmobiliaria Oriok, ezingo du aurreko urteetan egin duen ekarpena burutu. Kike Lopezekin akordio batera iritsi beharra zegoen eta arraunlari batzuei libre utzi zaie beste klubetara joateko. Horregatik etxekoen alde egingo dute argi eta garbi. Hegoi Intxauspe izango da entrenatzaile berria, Ekhi Illarramendi laguntzaile duela. 26 arraunlarirekin ari dira lanean eta momentuz gustora daude ikusitakoarekin.
Bazkide batzuk kexatu egin ziren batzarra Aian ospatu zelako. Beraien ustez, Zarautzen egin behar dira bilera hauek. Zuzendaritzaren asmoa bazkideei instalakuntzak erakustea izan zen baina hurrengorako Zarautzen egingo dutela ziurtatu zuten. Urtarrilaren 23an Zarautzen burutuko dute batzarra, horrela bazkide guztiak konten egoteko.
