Ze egoeran dago Sanpedrotarra Arraun Elkartea ekonomi eta kirol arloan?

Ekonomi arloan ondo dago. Babesleak jarraituko du eta alde horretatik lasaitasuna ematen dizu etorkizunari begira. Kirol arloan ez hain ondo. Hamaika arraunlarik utzi dute taldea eta hiru errekuperatu ditugu. Baja asko dira baina traineru polita egiten ari garela uste dut.

Zeintzuk izango dira zuzendaritza berriaren helburu nagusienak?

Zuzendaritza berriaren helburu nagusiena traineru lehiakor bat gauzatzea izango da. Aurten mutilek eman duten maila ikaragarria izan da eta badakigu maila hori mantentzea zaila izango dela. Arraunlari dezentek utzi dutenez kluba lan gehiago egin beharrean gaude baina gogotsu.

Jende berria egongo da zuzendaritzan edo aurreko urteetan egon den jendea jarraituko du?

Zuzendaritza berria izango da. Bakarrik Jose Manuel Oiarbidek jarraituko du ordezkari lanetan. Jende berria ez dakit zeren eta aurreko urteetan zuzendaritzan aritu gara baina aurreko denboraldian zeudenak ez dute jarraituko.

Zenbat arraunlari dituzue gaur egun?

22 mutil ditugu klubean. Kopuru polita da ikusita zenbatek utzi duten taldea. Hilabete hauetan zehaztuko da dena baina 22-24 arraunlari izango ditugu. Bigarren trainerua ateratzeko ez digu ematen baina beste elkarteekin elkartuz lortuko dugu denek arraun egitea.

Gabi Larrinaga izango da entrenatzailea?

Bai. Gabi Larrinaga izango da entrenatzailea. Aurten Aitor Baldaren laguntzaile bezala aritu da. Gaitasun handiko arraunlaria da, beteranoa eta uste dugu pertsona aproposena dela.

TKE Ligak, Arantzazun eginiko bileran, harrobia babestea adostu zuen arraunlari propioen kopurua igoaz. Zure ustez arrauna irabazten ateratzen da erabaki honekin?

Nere iritziz, bai. Arraunlari propioen kupoarekin ados nago. Gipuzkoako klubak berdin gaude egoera honen aurrean. Beste batzuk baino diru gutxiago daukagu eta gure arraunlariak babestea ongi deritzot. Klub indartsuen aurrean ez dago ezer egiterik baina legeak babesa hori ematen digu eta lehiaketari mesede handia egingo dio, bestela alde handiak egongo dira. Ongi dago dirua egotea baina diru gehiegi egoteak min egin diezaioke talde askori.

Nola ikusten duzu arraunaren etorkizuna?

Ondo. Liga indartsuak daude. TKE Liga oso liga polita eta indartsua da eta KAE Liga ere lehiaketa garrantzitsua da. Gaur egun ditugun arauak hobetu daitezke baina ezin gara kexatu. Arautegia ongi dago baina arlo batzuetan aldatzea komeni da.

Adibidez?

Aurrekontu orekatuago bat ezarri behar dugu Arraun Elkarteen artean. Ezin da onartu kluben artean dauden aldeak handitzea, erregulatu beharra dago arraunaren onerako. Ez dut esan nahi denek aurrekontu berdinak izan behar ditugunik baina oreka bat mantendu beharra dago.

Aukeratzekotan TKE Liga ala Kontxako bandera?

TKE Liga zalantzarik gabe. Kontxa bi estropada dira eta liga berriz, 20 estropada eta nere ustetan meritu handiagoa du ligak irabaztea Kontxa baino. Erregularrena izatea lorpen handiagoa da. Kontxa estropadarik garrantzitsuena da baina ez da dena eta TKE Ligak aldiz, denboraldi osoan eginiko lana saritzen du.