Estropada jaitsieretan maila polita eman duzute. Ze sentsazio uzten dizu orain arte egindakoa?

Orain arte gustora ari gara lanean eta goruntza joatea espero dugu. Estropada jaitsierak test hutsak dira, baina taldeek geroz eta garrantzi handiagoa ematen diete estropada hauei eta ongi ibiltzeak lanean ondo ari garen seinale da.

Bateletan goiko postuetan ibili zarete eta trainerilletan maila bikaina ematen ari zarete. Traineruan ondo ibiliko zareten seinale?

Ez da seinale txarra txalupa txikietan ongi aritzea. Trainerilletako ligako lehen estropadan bi ontzi onenen artean sailkatu ginen, baina traineru denboraldia luzea da eta jende gehiago behar da aldaketak burutzeko. Soberan ez daukagu inor.

Zumaia harrobian oinarritzen den kluba da. Horrek abantaila baino gehiago eragozpen gehiago izatea suposatzen du gaur egun arrauna dagoen moduan?

Harrobia lantzea ona da zalantzarik gabe, baina talde guztiek amua prest dute arraunlariak arrantzatzeko. Horregatik diru apur bat izatea litzateke onena, etxeko arraunlariak mantendu eta kanpoko hiruzpalau ekartzeko.

Zein izango da Telmo Deun ontziaren helburu nagusiena denboraldi honetan?

Lehen helburua TKE Ligako play-off-ak sahiestea da. Helburu eskura dugunean, bigarren txandan sartzen saiatuko gara. Eta azkenik, Kontxako Banderan izatea, nahiz eta badakigun ez dela erraza izango.

Nola ikusten duzu aurtengo TKE Liga? Alde handiagoak egongo dira taldeen artean lehengo urtearekin alderatuz?

Maila geroz eta handiagoa da TKE Ligan. Taldeak indartzen saiatzen dira urtetik urtera eta distantziak antzekoak izango direla uste dut. Hala ere, beti egoten dira, bajak izan eta uste baino okerrago aritzen dena, baina 6-8 ontzi denbora gutxiren barruan ibiliko direla uste dut.

Eta arrauna orokorrean?

Orokorrean ongi ikusten dut. Hutsune handiena gazte mailetan ikusten dut, geroz eta jende gutxiago baitago gazteekin lan egiteko gogoarekin.

Gaur egun dauden ligekin ondo egituratua dagoela uste duzu? Zer falta zaio arraunari beste kirolen mailara iristeko?

Ongi egituratua dagoela uste dut: TKE Liga aurreneko maila bezala, indartsuena eta besteak ahulagoak KAEn. Beste kirol batzuen mailara iristeko babesle gehiago eta telebistaren inplikazio handiagoa falta zaiola uste dut.

Harrobia lantzea ala ikuskizuna eskaintzea? Zein da egokiena arrauna bizirauteko eta jendea erakartzeko?

Bien arteko konbinazioa. Jendeak ikuskizuna nahi du, baina horretarako ezinbestekoa da arraunlari berriak egotea eta erakartzea.

Aukeratzekotan TKE Liga ala Kontxako Bandera?

Kontxako Bandera inongo zalantzarik gabe. Tostako arraun munduan dagoen banderarik preziatuena da.

Motzean

·Traineru bat: Telmo Deun

·Arraunlari bat: Joseba Etxabe "Txatito" (1980.hamarkakoa)

·Patroi bat: Xabier Eizagirre

·Estropada bat: Kontxako Bandera

·Bidai bat: Argentinara

·Leku bat: Zumaia

·Amets bat: Berriz Kontxako Bandera irabaztea Zumaiarekin