Bidaia hasieratik bukaerara arte filmatu zuten, bi kamerarekin; batak, itsasotik jarraitzen zien eta besteak, lehorretik. «Garbi geneukan erromesaldiaren ikus-entzuteko testigantza jaso nahi genuela», azaldu du abenturaren koordinatzaileetako bat izan zen Juan Angel Garmendia Xarpasek. Irudiak Andoaingo Zine eta Bideo Eskola ikasleek jaso zituzten, eta ikus-entzunezkoa sustatzailearen seme Urtzi Garmendiak ekoitzi eta muntatu du. Parte-hartzaileen adierazpenak eta sentipenak tartekatzen dituen kronika da Itsasoko erromesak lana. «Zirrarak, barreak, emozioak, poz malkoak… Polita izan da hiru urte geroago bidaia gogoratzea. Oso zaila da 35 orduko materiala 80 minututan laburtzea, baina emaitza txukuna geratu da». Hasiera batean, arraunlarientzat oroigarri izateko asmoa zuen ikus-entzutekoak, baina gero eta oihartzun gehiago izaten ari da. Dena dela, oraindik ez dute erabaki aurrera begira zein pauso emango duten. Donejakue Bidea oinez egin ondorez, itsasoz egin nahi zuela komentatu zion lagun batek Juan Angel Garmendiari. Euren arteko solasaldietan gaia behin eta berriz azaltzen zela-eta, azkenean taldetxo bat osatu eta bidaia antolatzeari ekin zioten. «Ibilbidea zehaztu, egun horietan zein kaietan geratu, herri horiekin harremanetan jarri… Nahikoa lan egin genuen lehorretik ere», nabarmendu du Garmendiak. Honek Karela kiroldegian lan egiten duenez, inguruko jendeari proposatu zion proiektua eta, hala, 22 arraunlari elkartu ziren abenturarako. Gehienak oriotarrak, nahiz eta tartean bi aiar, zarauztar batek eta villabonatar bat zeuden. 2007ko uztailaren bukaeran abiatu ziren eta 13 itsas etapatan osatu zuten Donejakue Bidea.