Klubaren plantilak sendotzeko asmotan dabiltza. Gazte mailetan denboraldi aurreko lehen lehiaketak hasi dira, baina liga hasi aurretik oraindik badago denbora arraunean hasi eta estropadetan lehiatzeko. Horregatik gazteen gabonetako opor hauek aprobetxatu nahi dituzte, maila guztietako arraunlariak gonbidatu eta horrela ontzi gehiago osatzeko (infantilak 12 eta 13 urte artean, kadeteak 14 eta 15 urte artean, jubenilak 16 eta 17 urte arte eta seniorrak 18tik aurrera). Maila bakoitzean talde bana ziurtatuta dago baina jendea izanda, zarauztarren nahia maila bakoitzean bina talde ateratzea litzateke. Materiala badago, entrenatzaile eta prestatzaileak ere bai, eta baita erakusteko gogoa ere.

Lehenengo aldiz hasi diren 6 neska ere badabiltza, oso gustura ibili ere, eta une honetan beste hainbeste hurbilduko balira (16-18 urte ingurukoak) pare bat urteko epean Zarautzen nesken trainerua ateratzeko moduan lirateke.

Senior mailan berriz, etorkizuna ziurtatze aldera, udan bi trainerurekin lehiatzeko erabakia hartu du klubak. Gaur gaurkoz 27 arraunlari eta 2 patroiko taldea ari da lanean eta bi ontziekin lasai ibiltzeko (KAE-1 eta KAE-2 mailatan) beste 7-8 arraunlari behar lituzkete. Horregatik, bertako harrobia egiteko asmotan Zarautz edo inguruko arraunlariak nahi dituzte bertako gazteekin aritzeko. Hori horrela, dei egiten diete 18 urtetik gorako mutilei taldean sar daitezen. Deialdia lehen arraunean ibilitako eta inoiz arraunik ukitu ere egin ez duten guztiei zabalduta dago. Etortzen denak jakin beza,gustura hartu eta jarraituz gero, udan zehar batean eta bestean estropadak jokatu eta kostaldea ezagutzeko aukera izango duela Zarauzko Enbata traineruan.